Am 1. Abrille 1979 sin e baar zämmeko und hän d Claraschnoogge grindet, mit em Ziel, d Kameradschaft und d Gselligkeit im Rahme vo Fasnachtsaggtivitäte z pfläge.
An dr Basler Fasnacht dail z näh isch e absoluts «Muss» und dr Höhepunggt fiir jede aggtive Fasnächtler und jedi aggtivi Fasnächtlerin.
Dä Grundsatz versueche d Claraschnoogge au hüt no z erhalte. Mir Schnööggli hege und fördere dä Grundsatz und fraie uns jedes Joor vo neuem uf dr Morgestraich, wenns z Basel vieri schloot und d Stadt während de drey scheenschte Dääg verzauberet wird.
Mir iiebe s ganz Joor jewiils am Mitwuche – kurz vor dr Fasnacht zuesätzlig no am Friitig. D Iiebige finde in unserem Käller – em Schnooggeloch – an dr Clarastrooss 5 statt.
S ganz Joor dure sind mir Schnoogge an verschiidene Aaläss aggdiv drbi; sig das dr Glaibasler Källerabstiig, d Adväntsgass, s Basel Tattoo oder sunscht irgend e glatti Hundsverlochete.
Mr hän au scho an Vorfasnachtsveraastaltige wie em Charivari oder em Mimösli dailgnoh. Gärn göhn mr au zämme uf Reise und bsueche anderi Aaläss im In- und Usland.